Kulttuurišilta yhisti alovehie

F’odor Ovčinnikovin artistismikaš esityš oikein mielty kaikilla, vaikka venäjänkielisillä ei ollun šelvä mistä on karjalankielini runo. 6+. Kuva: Uljana Tikkanen

Belgorodin alovehen Stroitel’-kaupunkin kirjašto kučču oman kaupunkin koululaisie tuttavuštumah Karjalan tašavallan kulttuurih internetin kautti. Šemmoni toimenpito oli järješšetty Kultekspress: Miun Venäjä on toistamatoin -projektin rajoissa. Kakši kirjaštuo järješšettih videoyhteyš ta vuorotellen kerrottih oman kotikunnan kulttuurin erikoisukšista.

— Šemmoni yhteyš on niin kuin tuttavuštumisen pikajuna. Ruttoh myö voimma nähä toisen kulttuurin etuštajie, kyšyö kanšallisien perintehien erikoisukšista. Šemmoset keškuštelut miellytäh lapšilla, ne aina vietetäh vilkkahašti ta mukavašti ta jätetäh hyvie vaikutelmie, korošti Kultekspress-projektin toteuttaja, kirjašton ruataja Anna Čerkašina. 

Karjalan kulttuurista kerrottih šuomelais-ugrilaisen koulun opaštujat šekä folkloriryhmien etuštajat ta kanšalliskulttuurin šäilyttäjät. Hyö vaštauvuttih Belgorodin alovehen kyšymykših: Mi on runo, kuin luajittih kantele ta mitä karjalaiset perintehellisešti pantih piällä. 

Kultekspress-projektie toteuvutah Belgorodin alovehella Stroitel’-kaupunkin kirjašton ruatajat. Matkuštamisen aikana lapšet šeisahutah Venäjän eri paikoissa ta tuttavuššutah šen istorijah, kanšah ta kulttuurih.