Karjalan nellä musejuo uuvvissetah
Rahua Karjalan nellän musejon uuvvistamiseh annettih federalisešta b’utžetista Kulttuuri-projektin rajoissa.
– Musejot voijah käyttyä rahua tarvittavien varuštehien oštamiseh, jotta šäilyttyä fondiloissa olijie esinehie ta järještyä näyttelyjä. Niise raha-apuo šuau käyttyä ruttosen internetin vetämiseh, šopivien olojen järještämiseh invalidija varoin, tilojen kunnoštamiseh, audio-oppahien valmistamiseh, nettišivujen ta virtualisien näyttelyjen luatimiseh, šelitettih kulttuuriministerijön lehistöpalvelušša.
Kemin kotišeutumusejo ylen taviččou tätä apuo. Šitä käytetäh Kamenevin kavulla musejon rakennukšen teknilliseh varuštamiseh.
– Musejon toini rakennuš on istorijallini. Kemin viimeni kauppiehan talo oli noššettu vielä vuotena 1900. Šiinä ei ole lämmityštä, šentäh nyt šielä pietäh vain väliaikasie kešänäyttelyjä. Šuavulla rahalla tahomma viettyä taloh lämmityštä, vettä ta luatie tulipalohälityšsistemie, šano Kemin kotišeutumusejon johtaja Irina Ustin.
Paikallisien musejojen kunnoštamini kanšallisen Kulttuuri-projektin rajoissa jatkuu vuosina 2023–2024. Koko Venäjällä Kulttuuriministerijön pitämän ohjelman rajoissa varuššetah noin 400 musejuo 73 alovehella. Musejot valitah kilpailun tulokšien mukah.
