Petroskoin valtijon yliopistošša koululaiset Karjalan piirilöistä ta Piiteristä kirjutettih livvin ta vienan murtehen kielikilpailun ruavot. Tarkistamah omie tietoja tuli 20 koululaista: 14 heistä kirjutti ruavon livviksi ta viisi vienakši.
— Tänne tultih koululaiset, kumpaset šuatih kielikilpailun enšimmäisen ošan paremmat arvošanat. Täh kilpailuh ošallistumisešta ta voitošta koululaiset šuahah lisäpistehet yliopistoh piäšömisen aikana. Venäjän 29 yliopistuo antau etuoikevukšie, šelitti Petroskoin yliopiston filologijan instutuutin itämeren-šuomelaisen filologijan laitokšen vanhempi opaštaja.
Ruavošša oli tehtävie muamon kielen ta kirjallisuon tarkistamisekši.
Karjalašša kielikilpailu livviksi piettih toiseh kertah, a vienakši enšimmäiseh. Ošallistujilla oli melko nellä tuntie ruavon kirjuttamiseh. Korkein arvošana kilpailušta on šata pistehtä. Enšimmäisellä paikalla piäššäh kaikki, ket suahah yli 90 pistehtä.
Kielikilpailun tulokšet ilmotetah šulakuun 1.–3. päivinä Federalisen Muamonkielien ta kirjallisuon kielikilpailun nettišivulla.