Karjalan kieldy nägövih piälinnas
Uvvet nimilaudazet mustoitetah kaksikielizii, kudamii azetettih linnas 1950-vuozil. Net ollah muzavansinizet valgien tekstanke. Ylembä on kirjutettu uuličan nimi ven’akse, alemba livvinkarjalakse. Oigiel on koin noumeru. Nimidä muudu tekstua nimilaudazes ei sua olla. Kai nimilaudazet nygöi pidäy olla yhty luaduu. Se luadiu linnan čomembakse.
– Syvyskuun 1. päivänny Petroskoil astuttih voimah uvvet nimilaudazien azetandusiännöt. Net voibi löydiä linnan hallindon saital. Sie on tarkah sellitetty, kui da midä pidäy kirjuttua, min suuruot nimilaudazet pidäy olla. Kyzymmö nimilaudazien tiluajii da luadijoi ennepäi lugie tarkah siännöt, ku jällespäi ei pidäs luadie nimilaudazii uvvessah, vakustau eländypaikku- da kunnostustarkastuksen hallindon nevvonandai Julija Prončenko.
Nimilaudazii tilatah da azetetah taloloin omistajat libo monifatierahizien kodiloin johtolaitokset. Petroskoil on jo azetettu läs kahtusadua uuttu nimilaudastu. Pahakse mieldy 30 on kirjutettu viärin. On rikottu oigei sanoin jälletys ven’an kielel.
– Kiinitämmö nimilaudazien tiluajien da luadijoin huomavuo juuri oigieh kirjutukseh da sanoin jälletykseh. On nimilaudastu kahtu luaduu. Konzu nimes on adjektiivu, pidäy enzimäi kirjuttua se. Ezimerkikse, Koivukävelykujo, Hil’l’u uuličču, Pimei uuličču. Konzu nimes on sana nominatiivas libo genetiivas, ezimerkikse, Leninan prospektu libo Tidenan ajotie, enzimäi pidäy kirjuttua sana prospektu libo ajotie, sellittäy Julija Prončenko.
Vahnoin nimilaudazien vaihtandah uuzih on annettu läs puoldu vuottu aigua, tulieh kevätkuussah. Uuličoin nimet ven’akse da karjalakse pidäy kirjuttua juuri muga, kui net on kirjutettu uuličoin luvettelos. Se löydyy linnanhallindon saital. A ku ollou midä kyzyttäviä, ga voibi kyzyö abuu linnanhallindos, kirjuttua sähköpoštači adresil.
