12.—22. uhokud Venämal kirjutadas “Venäma — rahvahiden kodi” -etnosaneluz Pohjoižen, Sibirin da Edahaižen Päivouzman polen igähižiden vähäluguižiden rahvahiden kelil. Tämbei akcijaha ühtniba vepsläižed-ki. Sanelust tuliba kirjutamha ristitud erazvuiččiš sferoišpäi, erazvuiččiden kelen mahtoidenke.
— Tämbei minä kucuin minun openikoid ühteta Etnosanelusehe, miše heil oliži voimuz kodvda ičeze kelen mahtoid da tedoid. Minai om openikoid, kudambad jo hüvin tedaba da pagižeba vepsäks, no om ristituid-ki, ked vaiše zavodiba vepsän kelen opendamižen. Kaik hö surel tahtol tuliba kirjutamha sanelust, sanub ”Vepsläižed besedad” -paginkluban vedäi Maria Kočerina.
Täl kerdal Etnosaneluz-akcijan teman oli “Minun rahvahan perehen tradicijoid da kal’huzid”. Sanelusen täht oli valitud tekst ”Poigad” nimel, miččes kaik voižiba sada uzid tedoid vepsän rahvahan perehen tradicijoiš. Nece starin mugažo opendab kaikid, miše pidab abutada vanhembile.
Akcijan tegii om ”Vepsän kul’tursebr”, abunikoin oma Karjalan Rahvahaližen da regionaližen politikan ministerstv, Karjalan rahvahiden sebruden kodi da ”Periodika” -painišt.