Podporožjes udes keradasoiš Nikolai Abramovan runotusen navedijad
”Hän eli meiden keskes” -runofestival’ mäneb Podporožjen keskuzkirjištos 24. vilukud, Nikolai Abramovan sündundpäivän. Festivalihe ühtneb norišt 12—35 vot. Pakičused ühtnendaha pidi oigeta männuden nedalin lophusai.
— Täl vodel mö saim 35 pakičust. Niid oigenziba školiden openikad da nored mehed Piterin agjan Vidl-, Nikol’skii-, Šugozero- külišpäi, Lodeinijas Pöudospäi da Podporožjespäi, Karjalan Mujezerskijan rajonan Voloma- küläspäi da Änižröunan Šokš-, Kalag’-külišpäi.
”Hän eli meiden keskes” -runofestival’ mäneb online- da offline-formatoiš. Se tehtas vides nominasijas: “Nikolai Abramovan runod vepsän kelel”, “Nikolai Abramovan runod venän kelel”, “Nikolai Abramovan armhad runoilijad”, “Venäman nügüdläižiden runoilijoiden töd”, “Sinun runosana”. Kaikuččes nominacijas valitas vägestajad.
Festival’ tehtas kerdan kahtes vodes, 2018. vodespäi zavottes.
