Kogonaižen voden 127 lahjakast mest voibištelihe ičeze projktoiš regionan kehitoitandan mödhe. Vaiše 16 heišpäi putui superfinalaha. Projektad, miččid kirjutiba konkursan ühtnikad, om oigetud sihe, miše pätta ani erazvuiččid socialižid da ekonomižid küzundoid meiden valdkundas.
”Karjalan ezinikad – 2021”-konkursan superfinal mäni Rahvahan elomišton da valdkundradon Venäman akademijan karjalaižes filialas. Vägestajikš tuli 10 mest, niiden keskes – vepsläine aktivist, ”Kiži”-muzejan radnik Anna Anhimova ičeze projektanke ”Etnokeitimpol’ ”Luzik”.
— ”Karjalan ezinikad – 2021”-konkurs nece om sur’ mahtišt! Neciš aigas sain äi uzid sebranikoid i opendajid. Minun projekt tuli mel’he žurikundale. Nece znamoičeb, miše Karjalan igähižiden rahvahiden sömižed om korktas arvostadud, miše niil om hüvä šans kaitas i kehitoittas, sanub Anna Anhimova.
Jo 10 vot Anna Anhimova tegeb suren radon tradicionaližen keitimpolen kaičendas i kehitoitandas, keradab sömižiden receptoid ekspedicijoiden aigan. Nügüd’ hän zavodib todenzoitta eloho ičeze projektan ezmäižen etapan. Ezmäi kaiked pidab
tehta analiz, miše tedištada, miččed sömižed oma tarbhaižed niiš vai toižiš rajonoiš i miččid gastronomižid uslugoid (mastar’-klassoid, degustacijoid, promoakcijoid) om neniš rajonoiš i ken niid tegeb.