Petroskoiš avaitihe Kul’turiniciativoiden prezidentfondan projektofis

Projektofisan avaiduzceremonijaha ühtniba Jevgenii Murahveri, Larisa Podsadnik da Aleksei Lesonen. Kuva: Karjalan Pämehen press-služb

Petroskoiš avaitihe Kul’turiniciativoiden prezidentfondan projektofis. Sen avaiduzceremonii mäni Karjalan Pämehen Artur Parfenčikovan tugel — hän tegi kožmusen Fondan pämehenke Roman Karmanovanke, siš tedotab Karjalan kul’turministerstvan press-služb.

Projektofis (Leninan avoird, 2A) om avaitud regionan aktivižiden ristituiden täht. Nügüd’ heil om voimuz sada abud grantpakičusen tegemižes.

Avaiduzceremonijaha ühtniba Fondan openduzprogrammoiden da regionaližen kehitoitusen varapämez’ Jevgenii Murahveri, Karjalan Valdišton socialižiden problemoiden varapäministr Larisa Podsadnik da kul’turministr Aleksei Lesonen.

— Projektofisad tegeba kebnembaks radod regionoiš, sikš ku mugoižiš ofisoiš radaba specialistad, kudambad kaiken aigan openbada da konsul’tiruiba pakičijoid. Meiden pätegend om todenzoitta kaik idejad, miše ni üht idei ei jäiži homaičemata, sanui Jevgenii Murahveri.

Karjalan eläjad da organizacijad aktivižesti ühtneba Kul’turiniciativoiden prezidentfondan grantoiden konkursoihe. 15 männuden konkursan aigan Karjala oigenzi 850 pakičust, miččišpäi 138 vägesti da sai rahatugen (enamba 250 millionad rubl’ad). Iče projektoiden avtorad mugažo andoiba rahoid, mi ozutab, miše valdkund om vaumiž todenzoitta erazvuiččid kul’turiniciativoid — openduzazjtegoišpäi surihe festivalihe.

Vides vodes Fond andoi rahatugen projektoile, miččed tegihe znamasižikš Karjalan täht. Mugoižiden projektoiden keskes oma “Mušton süvüz’. Belomorskan bunkerad” -muzeiprojekt, “Karjalaižen nevestan pridanoje” -rahvahaližen tradicijoiden škol, “Sinun lähtend efiraha” -videoblogingan škol, “Kul’turiden dialog — sebruden sildad” -rahvahidenkeskeine muzikškol, “P’otran tegosatused” -lapsiden mul’tfil’moiden tegemižen projekt.

Tärktembaks tehtas rad specialižen voinoperacijan ühtnikoiden,veteranoiden da heiden kanzoiden projektoidenke — ühthižtös “Kodiman kaičijad” -Fondan regionaližen filialanke.

Ičeze radmatkan aigan Jevgenii Murahveri mugažo vastsihe sädandprojektoiden avtoroidenke — kut mahtokahidenke, muga noridenke-ki. Hän starinoiči Fondan voimusiš, andoi vastusid küzundoihe da ozuti, kut paremba tehta grantpakičusid.

Projektofisaha voib tulda kaikutte Karjalan eläi, kudambal om sädandidejoid da projektoid.

Uzištoid neciš temas voib lugeda mugažo karjalaks da suomeks.

Tarkištele "Oma Median" Telegram-kanalad!