Kalages avaitihe Vepsän tanaz
Kalages zavottihe tehta etnopark ”Kalarand”. Nügüd’ sigä jo letihe čoma paviljon Vepsän tanaz Rahvahaližen da regionaližen politikan ministerstvan raha-abul. Ozatelmaha Kalagen eläjid čoman azjanke tuli Vepsän rahvahan hor Šoutjärvespäi. Horan ühtnikad ühtes ohjandajanke L’udmila Melentjevanke hüviš meliš kargaižiba da pajatiba.
— Om hüvä, miše eloho tuleba mugoižed projektad, miččed abutaba kehitoitta vepsän kul’turad, da niiden abul vedetas surid keskrahvahaližid festivalid, sanui horan ohjandai L’udmila Melentjeva.
Vepsän tanhan katuz da ezisein om kattud vanhan vepsläižen tradicijan mödhe – drankal. Tämbei-ki küläs voib nähta enččid kül’betid, miččiden katused om kattud drankal, a Vologdan agjas nece tradicii eläb nügüdehesai-ki.
Vanhan vepsläižen tradicijan mödhe ezmäižen pert’he pästtihe kaži. Vepsläižed uskoba, miše kaži tob pert’he hüväd elod.
Vepsän tanaz linneb hüvän sijan, kus voib tundištadas vepsän kul’turanke. Täs voib vedäda erazvuiččid mastar’-klassoid, vastusid da azjtegoid.
