Kalag’-posadan školan täht om osttud uz’ avtobus
Kalag’-posadan školas opendasoiš ei vaiše sijaližed lapsed, no lapsed-ki susedkülišpäi. Kaikuččel päiväl školha da tagaze kodihe heid vedetas školan avtobusal. Kalagen školan pämez’ Svetlana Gotič jo koume vot tagaze oigenzi Openduzministerstvaha kirjeižen, miččes oli kirjutanu, miše školale pidab uz’ avtobus. Enzne avtobus om jo vanhtunu, se kohetihe erasid kerdoid. Männudel vodel pakitihe jo abud valdkundan pämehel. Nügüd’ uz’ avtobus školas om.
— Nece avtobus om hüvä, se om mugoine, kut pidab-ki. Se ajab vaiše 60 km/č. Siš om uz’ lämoi, sured zirklod. Avtobus om lämemb enttušt. Lapsile se tuli mel’he. Hö nedalin oma varastanuded, konz mö ajam udel avtobusal, mašinanvedäi Nikolai Rostkov sanub.
Kaikuččel päiväl školan avtobus vedäb 35 last 15 kilometrad Kaskezaspäi, Toižegespäi da Kalagespäi školha da tagaze kodihe. Mugažo lapsid vedetas Petroskoihe erzvuiččihe azjtegoihe.
