Vägestusen päiväle omištadud azjtegod jatktasoiš. Änižröunan Kalagen, Šoutjärven da Šokšun školiden openikad da opendajad ühtniba ”Vägestusen dorog”-akcijaha. Matk avtobusoil zavodihe Kaskezas i lopihe Šokšus. Akcijan ühtnikad tegiba azotusid muštsijol da muštpachidenno i oma viritanuded kahesa Mušton tohust kolnuziden saldatoiden muštoks.
— Matkan aigan Šoutjärven istorijan opendai Marina Vasiljevna Krainova starinoiči vointoriš vepsän mal. Kalages azotimoiš pertinno, kus sündui Anna Lisicina. Om tärged starinoita lapsile ičeze kodiröunan istorijas, miše hö arvostaižiba sanad ”mir”, muštaižiba meiden rahvahan urohontegoid i ülendaižihe ičeze gerojoil, sanub kalagen školan opendai Ol’ga Mironova.
Šoutjärves openikad opendajidenke kävuiba muzejaha, mitte om školas. Šoutjärven eläi, ecindjoukun ohjandai Viktor Lonin starinoiči, kut hän openikoidenke ajeleb ecindekspedicijoile.
Akcijan ühtnikoil oli voimuz nägištada predmetoid da kolnuziden saldatoiden veššid, miččid löudas ekspedicijoiden aigan.