Koštamukšen luonnonšuojelualoveh ta Kalevalan kanšallini puisto yheššä Karelski okatiš -yhtijön kera valmissetah uutta turistimatkua Venehjärven kyläššä.
Uuvven reitin nimi on “Rautašuo”. Šiltä paikalta 1700-luvulla oli noššettu šuorautua.
– Luontomatan kunnoštamiseh otetah ošua vapaehtoset volont’orit, kanšallisen puiston ta šuojelualovehen ruatajat, jotta šuaha toisen kunnoštamisvaihien työt valmehekši: lat’ata puušillat šuon yli, šiivota kävelypolut, korjata pois kuatunuot puut ta piikkilanka. Kaikin ruattih šopusašti ta poikkoseh. Yheššä päiväššä šuatih luatie kaikki, mitä šuunniteltih, šanottih uuvven reissun luatijat.
Kun kaikki ruavot lopetetah, Venehjärven nähtävykšie täyttäy kahen kilometrin pituni Rautašuo-polku. Šitä myöten aštuos’s’a šuatta tietyä mitein šoista šaitih rautamalmie. Nyt šielä jo on olomašša šamanien polku. Tietomiehien ta tietäjien, šekä runonlaulajien jälkeläini Aleksandr Lesonen on teijän oppahana. Tulkua käymäh Venehjärveh!