“Periodika” ezitab Karjalan fol’klorišt jäl’gestust “Kalevalan ma” -etnofestivalil
“Kalevalan ma” -etnofestivalin finalas “Periodika”-painišt ezitab “Karjalan rahvahan endevanhoid runoid” -interaktivižen ozutelusen. Azjtego mäneb tämbei, 13. keväz’kud, Piteriš.
— Änetusen ozutelusen täht tegiba Karjalan arvostadud artistad Aleksandra Aniskina da Andrei Gorškov. Ühtes Karjalan Kelen, literaturan da istorijan institutan tedoradnikanke Valentina Mironovanke starinoičem Karjalan fol’klorižes jäl’gestuses, miččen pohjal om kirjutadud-ki “Kalevala” -epos, starinoiči “Oma Media” -portalale “Periodika”-painišton pämez’ Natalja Sinickaja.
Hän mugažo sanui, miše festivalil linneb ezitadud “Runosarnad”- da ”Runosarnad 2” -kirjad.
— Nece om üks’ “Periodikan” ozakahiš kommercižiš projektoišpäi. Ezmäižen kirjan mö paindam jo nelländen kerdan, a “Runosarnad 2” paindam koumanden kerdan, ližazi Natalja Sinickaja.
Azjtegon ühtnikoile tehtas täuz’ tedolišt-azjaline programm. Ičeze radoid ezitaba ekspertad Karjalaspäi, Moskvaspäi, Piterišpäi, Piterin agjaspäi, Kriman da Komin valdkundoišpäi.
Festivalin finalas tehtas konkursoiden vägestajiden pauklahjoičend. Necil vodel konkursprogrammaha ühtni enamba 5000 mest Venäman erazvuiččiš agjoišpäi. Ühtnikoiden enambišt om Moskvaspäi da Moskvan agjaspäi, Piterišpäi da Piterin agjaspäi, Murmanskan agjaspäi, Čuvašian, Komin, Karjalan i Kriman valdkundoišpäi.
“Kalevalan ma” -etnofestival’ pidetas kaikuččen voden zavottes 2006. vodespäi.
Uzištoid neciš temas voib lugeda mugažo karjalaks, suomeks da venäks.
