Lihoslavlissa paissah karjalan kielen ta kulttuurin šäilyttämiseštä
Kakši kulttuurie — ykši kotimua -konferenšši alko Lihoslavlin kulttuuritalošša. Koko päivä on omissettu nykytärkeijen proplemojen ratkaisujen ečinnällä.
Juhlallisissa avajaisissa esiinnyttih aikuhisien ta lapšien folklooriryhmät, tervehyššanoja šanottih viranomaiset ta konferenššin vierahat.
— Karjalaisie yhissetäh istorijan šivut, kanšan läheiset perintehet ta kulttuuripiirtehet. Meilä tämä on ylen kallista ta myö yritämmä šiirtyä šitä lapšilla, šano Lihoslavlin hallintopiirin piämieš Natalja Vinogradova.
Esitykšissä oli koroššettu, mimmoset projektit toteuvutah Tverin alovehen eri paikoissa ta mimmosie proplemoja pitäy ratkaissa.
Kolme piäesittelyö tuttavušti kuuntelijie karjalan kielen tilanteheh Karjalan tašavallašša ta Tvetin alovehella.
Pakina jatkuu kuuvvešša ošaštošša, missä nykytärkeistä karjalaisen kanšan kulttuurin ta kielen šäilyttämisen kyšymykšistä paissah tarkemmin.
Illalla kokonaisissunnošša luajitah piätökšie, mimmosie ratkaisuja ta toimenpitoja on tehtävä kielen šäilyttämiseh ta perintehien kehittämiseh.
