Koštamukšešša toimija Viena-šeura šai uuvven statussin
Karjalaisen kulttuurin Viena-šeura tuli autonomisekši ei-kaupallisekši järješšökši “Etnokulttuurikeškuš Viena”. Uuši statussi antau uušie mahollisukšie, ka ruavon perušteh šäilyy muuttomattomana.
— Nyt myö voimma pityä makšullisie tilaisukšie ilmasien lisäkši: festivalija, konserttija, muasteri-oppija, kurššija. Šitä ennein myö emmä voitu ottua makšuо ihmisiltä, emmäkä voi oštua tarvittavie vehkehie muasteri-oppija varoin. Niise uuši järještö voipi kirjuttua projektija ta ošallistuo granttikilpailuih, šelitti järješšön puhienjohtaja Julija Filippova.
Uuši järještö rupieu jatkamah šeuran toimintua šäilyttyän ruavon piäperušteh — ruatua karjalaisen kulttuurin ta kielen kehittämisekši ta šäilyttämisekši, jotta še šiirtyis tulijilla šukupolvilla.
Viena-šeura toimiu Koštamukšešša ta kehittäy Vienan Karjalan kulttuurie, šäilyttäy karjalan kieltä. Še pitäy kymmenie toimenpitoja vuuvvešša ta yhistäy noin 30 henkie.
