Karjalašša on kanšallisie luomisryhmie, käsityömuasterija šekä oman kulttuurin harraštajie, kumpaset tarvitah tietoja perintehellisistä vuatteista ta niijen käytöštä.
– Projektin alkuhpanijana ta johtajana on Karjalan tašavallan kanšallisien kulttuurien keškukšen spesialisti, Karjala-yhtyvehen ošallistuja Ol’ga Husu. Hiän kučču projektih oikeita ammattimiehie. Projektin ryhmä luatiu karjalaisie pukuja, valiččou istorijallisie valokuvie ta videoita, kuvuau videoita, ilmotetah Karjalan tašavallan kulttuuriministerijön spesialistit VK-šivulla.
Karjalaisien piähinehien lajiloista ta niijen käytöštä kerrotah Karjalan tašavallan karjalaisien, vepšäläisien ta šuomelaisien kieliresurssikeškukšen spesialisti Natalja Denisova ta pukujen asientuntija Jekaterina Logvinenko. Šamah aikah Natalja ta Jekaterina iče valmissetah vienankarjalaista naisien ta lapšien pukuo.
Miehien pukuo omplelou Karjalan kanšanmuasteri, Kižin musejon perintehellisien käsityöammattien ošašton johtaja Marina Guseva.
Karjalaisien naisien koriššukših tuttavuššuttau Milii Balakirevilla nimitetyn Petroskoin lapšien taitokoulun opaštaja, kanšanpuvun muasteri Polina Vorobjova.
Tämän čopakan ruavon tulokšie kohta esitetäh Kanšallisien kulttuurien keškukšen Youtube-kanavalla ta VK-šivulla.