Kanšalaisjärještöt vaikutetah positivisešti yhteiskunnan tilanteheh
Kanšalaisien yhteiskunnan kehittämisen ta ihmisien oikeukšien puoluštamisen kyšymykšie noššettih pakinalla Karjalan piämiehen etuštajan pitämäššä issunnošša.
Issunnon johtajana oli Karjalan kanšallisen ta alovehellisen politiikan ministeri Sergei Kisel’ov ta siinä esiinnyttih Kanšainvälisien šuhtehien šekä yhteiskunnallisien ta uškonnollisien järještöjen kera yhteistyötä hoitajan ošašton johtaja Irina Krutikova, Yhteiskunnallisen kamarin johtaja L’ubov’ Kulakova ta ihmisien oikeukšien puoluštaja Larisa Boičenko.
Karjalan kanšalaisjärještöt aktiivisešti toimitah ta toteuvetah sosialiprojektija. Šemmoni työmuoto vaikuttau positivisešti yhteiskunnan tilanteheh.
– Tänä vuotena ilmotetah šuuri granttien kilpailu, kumpani yhistäy Karjalan piämiehen ta presidentin šiätijöjen varoja, niijen miärä on 80 miljonie rupl’ua. Kilpailuh voijah ošallistuo eri aloilla toimijat ei-kaupalliset järještöt. Kilpailušša on eri nominatijoja, šentäh kun še yhistäy eri aloilla toimijie järještöjä. Yhteh projektih voipi anuo 500 000 – 2 000 000 rupl’ua, šano esitykšen aikana Irina Krutikova.
Kanšalaisjärještöjä varoin pietäh seminarija, kumpasilla kerrotah kilpailun pitämisen ta projektien toteuttamisen šiännöistä.
Yhteiskunnallisen kamarin johtaja Ljubov’ Kulakova kerto vuuvven ruavon tulokšista ta korošti, jotta pandemijan aikana toiminta jatkuu ta näyttäy hyvie tulokšie. Issunošša ehotettih kerätä tietoja kanšalaisjärještöjen hyväštä ta onnistunuošta projektien toteuttamisešta ta jatkua kerätä tietoja kaikista ei-kauppallisista kanšalaisjärještöistä.
Ihmisien oikeukšien puoluštaja Larisa Boičenko niise kerto vuuvven ruavon tulokšista. Kokoukšen aikana tuli ehotuš jatkua hänen järještämän Ihmisien oikeukšien yliopiston rajoissa pitämie luventoja, kumpasien aikana kerrotah kanšalaisien oikeukšien puoluštamisešta ta kumpasih ruvetah kuččumah mukavie lehtorija, jotta ihmiset enemmän tiijettäis omista oikeukšista ta šiitä, mitä ruatua, još valtijo rikkou niitä.
