“Kukkien valšši” on online-kuvanäyttelyn nimi. Kanšallisen puiston ruataja Tatjana Jungina monen vuuvven aikana keräsi kukkien valokuvie. Valokuvat tuttavuššutah niise puiston harvinaisih kašviloih: joka valokuvašša on kirjutuš, mi kukka tämä on.
– Ideja luatie tämmösen näyttelyn tuli puiston yhen ošašton johtajalla Anastasija Protasovalla. Näyttelyh otettih vain pieni oša miun kukkavalokuvien kokoelmašta. Mie aina otan valokuvie ta tiijän, konša kašvi noušou muašta, konša še kukkiu, tiijän, jotta šemmosie valokuvie pitäy ottua, šäilyttyä ta näyttyä toisilla, kerto Tatjana Jungina, Puanajärven kanšallispuiston ruataja ta opaš.
Valokuvanäyttely niin kuin muissuttau, jotta puisto šuositun matkailupaikan lisäkši on vielä ni harvinaisien kašvien šuojapaikka.
Tatjana Jegorovna ruatau puistošša yli 25 vuotta. Šiinä ajašša hänen valokuvakokoelma huomattavašti kašvo. Viime kymmeneššä vuuvvešša hiän käyttäy digitalista kamerua. Valokuvie on ylen äijän, ainuoštah hänen Vkontakte-šivulla on yli 37 tuhatta valokuvua.
Kaunehie kukkie voitta ihailla Puanajärven puiston Vkontakte-šivulla.