“Periodika” on resurssi opaššukšešša ta tutkimukšešša
Joka vuosi Itämeren-šuomelaisen filologijan laitokšen enšimmäisen kurššin opaštujat käyväh tuttavuštumah Periodika-kuštantamon toimintah. Tänäpiänä karjalan, vepšän ta šuomen kielen opaštujat nähtih mitein toimitukšien ruato on järješšetty, mitein ruatau Kanšojen yštävyštalo ta mimmosie toimenpitoja on Karjalaisien, šuomelaisien ta vepšäläisien resurssikeškukšešša.
— Miula on tunneh, jotta tiälä voipi košettua mitänih šalaista ta arvokašta, mi liittyy Karjalan kanšojen kanšanrunouteh ta kielih, šano Tatjana Rikova, vepšän kielen opaštuja.
— Miula tuli ymmärtäminen, kuinka arvokašta on painojulkaisujen valmistamini. Šamoin niän, jotta nämä julkaisut ollah mukavie eri ijän ihmisillä, lisäsi šuomen kielen opaštuja Polina Ivanova.
— Miula tuli tunneh, jotta “Periodikan” spesialistit ruatah šuurella innolla. Niise on mukava tulla erilaisih pitoloih kuštantamoh, korošti karjalan kielen opaštuja Jekaterina Lisenko.
Vierailun lopušša opaštujat tuttavuššuttih keškiaikaseh pukuh.
