“Marii pamaš” esitti marilaista perintyö Petroskoissa
Mari pamaš -kollektiivin artistat yheššä Karjalan marilaiset -kanšalaisjärještön kera vietettih tapuamista Karjalan kanšojen yštävyštalošša, missä kerrottih Periodika-kuštantamon ruatajilla Pelediš pairem -pruasniekašta ta kanšanšoittimista.
Pelediš pairem on tärkeimpie marilaisie pruasniekkoja. Enši kertua šitä juhlittih vuotena 1920. Pruasniekka peruššettih neuvoštoaikana, ka ajan mittah še myöšty marilaisih juurih ta nykyjäh šiih kuuluu perintehellisen marilaisen ušon ritualija.
– 1900-luku oli vaikie Mari Elin tašavallalla. Vuuvvet 1920–1923 tuotih kuivutta, tautija, kylmie talvija. Oli tärkie innoššuttua marilaista rahvašta ta peruštua pruasniekan, kumpani ois herättän ihmisissä luovua innoššušta, korošti Karjalan marilaiset -järještön johtaja Mihail Asessorov.
Marii pamaš -yhtyveh on 48 vuotta vanha. Nykyjäh šiinä on 32 artistua. Nuorimmalla heistä on 16 vuotta, a vanhimmalla on 70 vuotta. Petroskoih tuli kollektiivin 16 ošallistujua. Yhtyvehen taito-ohjuajana on Marija Solovjova.
– Meijän kollektiivin yštävyššuhtehet Karjalan kera alettih vuotena 1988. Šilloin “Marii pamaš” tuli šuomelais-ugrilaiseh festivalih, kummaista vietettih Kiži-šuarella, kerto taito-ohjuaja.
Laulut ta tanššit ollah marilaisen pruasniekan pakollisie elementtijä. Tapuamisešša marilaiset artistat šoitettih tärkeimmillä kanšallisilla šoittimilla – tumirilla ta šuvirilla šekä kerrottih niijen erikoisukšista.
Illalla halukkahat šuatih ihailla tarmokkahie marilaisie tanššija ta omaperäsie lauluja Marii pamaš- ta Šuldir -yhtyvehien konsertissa Kantele-talošša.
