”Kalevala”-eposan runod udes raigaškandeba Karjalas
Petroskoin valdkundaline universitet tedoti, miše 1.–14. uhokud mäneškandeb pakičusiden otand ”Lugem ”Kalevalan runod” konkursaha. Ühteta konkursaha voiba školiden, universitetoiden da kolledžiden openikad da Karjalan, Mordvan, Komin valdkundoiden da Tverin agjan eläjad. Konkursas om koume igägruppad: 12–15 vot, 16–23 vot, 24 da enamba vot.
— Miše ühteta konkursaha, pidab tehta videorolik ”Kalevala”-eposan runoiden lugemiženke än’heze da oigeta se elektronižele počtale, – tedoti Petroskoin valdkundaližen universitetan saital.
Konkursas om koume nominacijad: ”Kalevalan” runod vepsän, suomen da karjalan kelel.
28. päiväd uhokud, ”Kalevalan” päivän, žürimehed tegeba ühtenvedod da pätaba, ked ühtnikoišpäi oma kaikid parahimad. Vägestajad saba diplomad.
Konkurs mäneb Rahvalaližen da regionaližen politikan ministerstvan tugel.
Uzištoid neciš temas voib lugeda mugažo karjalaks, suomeks da venäks.
