Vuuvven piäšeikkailu piettih Šuojärven piirissä
Kešäkuun 10.—12. päivinä Karjalašša piettih Red Fox -šeikkakilpailut. Red Fox -šeikkailukilpailut piettih 20. kertah. Tänä vuotena niijen paikakši oli valittu Šuojärven piiri: Šuojärvi, Šuojoki ta niiltä pohjoiseh šuuntah levennyöt mečät.
Urheilijat kuoteltih omie voimie lyhyöššä — 24 tuntie ta pitäššä — 48 tuntie ajošša. Miärätyššä ajašša piti piäštä 120—250 kilometrie, näyttyä šuunnissuškykyjä, pärjätä vaivuon, kylmyön ta kivun kera, käyttyä kaikki voimat, jotta juošša, uija, pyöräillä, melata ta eččie šuunnissušpistehie.
Kilpailun järještäjät joka kerta kekšitäh uušie ošie, tänä vuotena še oli pakraft-venehen käyttö jovella ta järvilöillä.
— Miun mieleštä juuri nämä ošat: melonta Šuojokie ta Tarasjokie myöten jiähäh ošallistujien muistih. Še on uuši kokemuš, šentäh kun pakraftie käytetäh tavallisešti järvilöillä ta jokiloilla, missä ei ole koškija. Myö valičemma uusie paikkoja kilpailukši ta kekšimmä aina mitänih uutta, jotta ainasilla ošallistujilla olis mukava ošallistuo, šelitti Red Fox-kilpailujen järještäjä Denis Kuprienko.
Kilpailu kyšyy ošallistujilta äijän voimie ta niise pitäy ošata toimie joukošša tahi parissa. On äijän kaikenmoisie keinoja, mitein piäštä koko matka loppuh šuaten, ka jotta šuaha hyvä tuloš pitäy puhuo yhteh hiileh ta tarkkah luatie piätökšie.
— Multiurheilu on erikoini laji. Joka tunti meilä oli minnih käršimyš, mi anto meilä uutta kokemušta. Kilpailu oli vaikiena, ka mukavana. Meilä on paraš joukko ta työ niättä, jotta ijäštä huolimatta täššä urheilušša voipi näyttyä hyvie tulokšie. Tätä urheiluo pitäy kehittyä ta kuččuo ošallistumah uušie ihmisie, šano pitän matan nellänihmisen voittajajoukon jäšen Ilja Stroganov.
Kun kaikki kuot’t’elukšet oli piäšty läpi joka urheilija šai metalin ta kirkkahie elämykšie šeikašta.
Pitäššä kilpailušša joukkojen kešen voitti Multisport-joukko, miešparien kešen voittajakši piäsi Red Fox Adventure -joukko, šekaparien kešen — Red Fox -joukko.
Lyhyöššä kilpailušša joukkojen kešen parahakši tuli Leningradin atomivoimalan joukko, miešparien kešen voittajakši piäsi Asfodelus -joukko, šekaparien kešen — RockRunRace -joukko.
