Musejojen yö -aktijo pietäh 21. oraškuuta. Kahen vuuvven tauvon piäštä aktijuo pietäh tavallisešša muuvvošša. Ennein pandemijarajotukšie takie še oli online muuvvošša. Karjalan piämusejot: Karjalan kanšallini musejo ta Kuvataitomusejo tuttavuššutettih lehtimiehie yön ohjelmah.
— Tänä vuotena meijän musejošša toimenpitojen teemana on “Perintehet ollah muotie”. Musejon kaikki ošaštot ošallissutah aktijoh, a keškilaitokšešša pietäh noin 50 toimenpituo ta 40% niistä on aivan uušie, šano Kanšallisen musejon johtaja Mihail Gol’denberg.
— Kuvataitomusejo tänä vuotena pitäy tilaisukšie online ta ofline. Myö piättimä jättyä online-muuvvon, šentäh kun meilä ilmešty meijän luventojen kaččojien joukko toisista paikoista. Petroskoissa musejošša piäšy näyttelyillä on vapua, niise on rikaš muasteri-oppien ohjelma lapšilla ta aikuhisilla, šelitti Kuvataitomusejon spesialisti Natalja Kozlovskaja.
Petroskoissa musejojen tapahtumih vuotetah yli 20000 ihmisie. Aktijon täyšie ohjelmie šuau löytyä musejojen Vkontakte-ryhmien šivuilta.