Kemin koulu on rakennettu, nyt pietäh laitokšen lisenssijointua. Nykyaikasešša ta mukavašša rakennukšešša on kaikki, mitä tarviččou, jotta opaššušprosessi mäni uuvvella tašolla. Koulušša rupieu opaštumah noin tuhat koululaista. Artur Parfenčikov kävi työmatalla Kemih ta anto koulun rakentamisešta korkiet arvošanat.
— Še on uuši kašvupisteh istorijallisešša kaupunkissa. Kemin koulu on erinomani arhitektuuriltah, ulkonävöltäh, sisätiloilta. Šiinä on šuuret ikkunat, tilavat käytävät, šuuret urheilušalit, mukavat luokkahuonehet, šano Karjalan piämieš, kun kaččo kouluo.
Koulušša on pruasniekkojen šali, ruokala, liäkärinhuoneh, kirjašto-tietokeškuš, erilaisien oppiainehien erikoisluokat kaikkine tarvittavine varuštehineh.
Uuši koulu tulou niise šuurekši urheilukeškukšekši. Šielä on kentät lento- , kori- ta potkupalluo peluamisekši, juokšutie, GTO-normien kompleksi. Nykyaikaset urheilušalit käytetäh urheilukilpailujen ta harjottelujen pitämisekši. Enšimmäini tapahtuma — urheiluleiri pietäh jo elokuušša.