Karjalan Alovehellizet yhteiskunnallizet nevvostot puututtih Ven´an parahien joukkoh
Kogo Ven´an assotsiatsii kerran vuvves pidäy yhtehizii kerähmölöi, kaččou, kui ruatah Alovehellizet yhteiskunnallizet nevvostot Ven´an eri puolil. Siegi ruavon mugah vallitah parahii nevvostoloi. Tänävuon parahien joukkoh puutui nelli Karjalan tazavallan Alovehellistu yhteiskunnallistu nevvostuo.
Tänävuon kilbah työttih 172 pakičustu Ven´an eri puolilpäi.
— Enzimäzen sijan Sugupolvien yhtevykset- nominatsies sai Mujehjärven piirin Sukkojärven kylän Gimoli-nimelline nevvosto. Kolmandele sijale Paikallizet taidoelintavat, initsiatiivat, turizman kehitys -nominatsies piäzi Anuksen piirin Kotkatjärven Hyväntahtožus-nimelline nevvosto. Nelländele sijale Tervellizen elaigutavan perustamine, liikundukul´tuuru da sportu -nominatsies piäzi Anuksen piirin Mägriän kylän Jyrgilän kylä -nimelline nevvosto. Viijendele sijale Alovehien tävvelline kehitys -nominatsies piäzi Petroskoin A4- nimelline nevvosto, ilmoitettih Ven´an Alovehellizien yhteiskunnallizien nevvostoloin kilvan järjestäjät.
Karjalan Alovehellizien yhteiskunnallizien nevvostoloin assotsiatsii myös oli palkittu, se piäzi kolmandele sijale Paras Ven´an aloveh -nominatsies.
Tuhukuul kaikkii, ket piästih parahien joukkoh, kučutah Moskovah yhtehizeh kerähmöh.
Hyvittelemmö kaikkii voittajii da toivommo, ku hyö iellehgi ruvetah ruadamah omien kylien da alovehien hyväkse. Nämmä voitot ollah ezimerkinny, ku jogahine nevvosto voi parendua omua elaigua da heijän ruaduo nähtäh da arvostetah kui omas kyläs, mugagi Ven´al.
