Suomelazen kinon nedäli pietäh Petroskois jo 23. kerdah. Tänävuon fil’moi kačotah yhtel aigua Piiteris, Petroskois da Murmanskas. Kinofestivuali pietäh internetas 29. ligakuudu – 5. kylmykuudu.
– Enne suomelazen kinon festivualin fil’moi ozutettih kinozualois, dai fil’moin ohuajat käydih Ven’ale nedälin avajazih. Tänävuon nedäli rodieu kogonah virtualizes formuatas, ga ohjuajat da nedälin valmistajat ollah yhtes kaččojienke verkosivustoloil. Nämmil sivuloil voibi kaččuo da kuulta ohjuajien pagizutteluloi, sanou Petroskoin konsulu Johannes Puukki.
Kinofestivualin programmas on kolme vuvven 2020 fil’mua, yksi vuvven 2014 fil’mu, dokumentufil’moi da jälgimäzien seiččemen vuvven lyhyzii fil’moi. Tänävuon ei ole fil’moi lapsile.
Kaikkii fil’moi suau kaččuo ilmai. Kaččojil pidäy tilata liput kinofestivualin internetsivul. Lipul voibi kaččuo fil’moi 48 čuasun aigah. Festivualin programmu voibi kaččuo sivul finnishfilmweek.tilda.ws.
– Lippuloi on kaikkiedah 1000 palua. Niilöi ei ole rajoitettu eri alovehile. Sendäh pidäy kiirehtiä, kuni lippuloi vie on, sellitti Puukki.
16+