Passipo lapšien ammuntahiihošta
Koštamukšešša piettih Alovehien väliset lapšien ammuntahiihon kilpailut Karjalan tašavallan piämiehen palkinnošta. Še oli Anna Bogalii urheilumal’l’a – Severstal’ -kilpailujen finali.
Koštamukšeh tuli 320 nuorta urheilijua ta 180 valmistajua Venäjän 19 alovehelta. Kilpailujen juhlalliset avajaiset vietettih 9. šulakuuta Družba-keškukšešša. Kulttuuritalon luovat kollektiivit esitettih urheilijilla ta juhlan vierahilla omie kirkkahie numeroja.
Karjalan piämieš Artur Parfenčikov korošti, jotta Koštamukšešta voit tulla ammuntahiihn Mekka.
– Tiälä ollah kaikki tarvittavat ehot: pitkä kauši, hyvä lumi ta reljefi, erioini ilma. Šen lisäkši meilä on erinomani joukko. Šen šyväimenä on Anna Bogalii. Yheššä myö rupiemma luatimah kaikkie, jotta ammuntahiihto Karjalašša kehittyis. Olen varma, jotta meilä tulou uušie meštarie, šano Artur Olegovič.
Urheilumal’l’an vierahie tervehti Karel’skii okatiš -kombinatin piäjohtaja Maksim Vorobjov. Severstal’-yhtivö tuli urheilumal’l’an Koštamukšen vaihien nimipartn’oriksi. Maksim Aleksandrovič korošti, jotta ammuntahiihon kilpailut ollah hyvin merkittävänä tapahtumana Koštamukšella.
Venäjän eri alovehilta tulluot 10–16-vuotiset lapšet kilpailtih hiihto- ta ammuntahiihtokompleksin sel’l’oilla sprintissä, supersprintissä, yhteisstartissa ta vuorokilpailušša. Perintehellisien kilpailujen lisäkši 13. šulakuuta piettih valmistajien ta järještäjien hiihtojuokšu, a 14. šulakuuta vietettih “Yštävyön vuorokilpailu”.
Šiä ei muhin urheilijilla. Oli kuin kova tuuli, niin ni vihma ta šulašiä. Yhtenä kilpailupäivänä tuuli ašetti ammuntahiihtäjie epätaša-arvosih oloih pualipaikkojen luona. Eryähien urheilijien pulikkoja tuuli vei pois, a konša tultih heijän kilpailijat, ni tuuli hilleni.
Šamoin valmistajat huomattih, jotta kova tuuli vaikutti liikkumiseh ta pienenti hiihtäjien vauhtie. Ka kaikki nämä vaikeukšet vain annettih urheilijilla lisyä intuo.
Koštamukšen ammuntahiihon ošaštuo kilpailušša esitti 22 urheilijua valmistajan Kristina Klimovan joholla.
– Mie panin urheilijien ieššä kakši tehtävyä: rauhallisešti ruatua linjalla ta piäššä loppuh šuaten. Kaikki lapšet pärjättih ta eryähät kašvatit äšen ylitettih miun toivomukšie. Valmistajien hiihtojuokšu niise mäni šujuvašti. Konša ammuin, ni ajattelin: “Miuh kačotah miun urheilijat, mie en voi ampuo ohi!” Kilpailut oli pietty hyvin korkiella tašolla, kerto vaikutelmistah Kristina Aleksejevna.
Koštamukšen urheilukoulun johtaja Maksim Bezuglii niise pani merkillä tapahtuman korkieta tašuo ta tärkevyttä paikallisilla urheilijilla.
– Myö opaššumma ammatillisilta urheilijilta. Mukava oli nähä niin äijän miärätietosie ta tarmokkahie ihmisie. Koštamukšen ammuntahiihtäjillä ošallistumini šemmosih kilpailuih on mahtava elämän ta urheilun kokemuš, kerto Maksim Sergejevič.
Mainičen ni šatojen volont’orien panokšešta urheilukilpailujen valmistamiseh ta viettämiseh. Vapuaehtosina oltih kuin koululaiset, niin ni aikuhiset. Yhet piettih šilmällä tilannehta pualipaikkojen luona, toiset painettih verekšie uutisie sosialiverkoissa, kolmannet autettih ruokailun ta palkintoseremonijan järještämiseššä, a nellännet šuunnissettih kilpailun vierahie.
Kilpailujen viimesenä päivänä, 14. šulakuuta palkittih voittajie ta myönnettih heilä keltasie maikkoja. Anna Bogalii, Karjalan opaššuš- ta urheiluministeri Roman Golubev šekä Koštamukšen ta Kemin piispa Boris palkittih lapšie diplomiloilla, mitaliloilla ta kallehilla lahjoilla sponssoriloilta.
Koštamukšen Anna Bogalii urheilumal’l’a – Severstal’ -kilpailujen finalin parahiksi urheilijiksi omissa ikäryhmissä tultih: Daniin Drozdov (Moskovan aloveh), Jekaterina L’angina (Karjala), Kirill Zonin (Permin alovehpiiri), Sofja Zaharova (Saratovin aloveh), Oleg Teremkov (Vologdan aloveh), Veronika Babuškina (Novosibirskin aloveh), Borislav Kn’azev ta Marija Obuhova (Ugmurtin tašavalta).
Kaikki kilpailupäivät urheilijien ta heijän valmistajien rinnalla oli urheilumal’l’an piäšankari – kakšikertani olimpijavoittaja, Venäjän ammuntahiihtoliiton lapšien ta nuorison urheilun varapresidentti Anna Bogalii. Anna Ivanovna autto ammuntahiihtäjie, pitišilmällä tilannehta sel’l’alla ta pualipaikkojen luona, palkičči voittajie ta rauhotti voitettuja.
– Myö yheššä luomma ammuntahiihon istorijua! Meijän kilpailuissa šytytäh nuoret tähet, kumpasilla on hyvie perspektiivijä tulovaisuošša. Kiitän kaikkie! Yheššä myö kašvatamma tulovaisuon šukupolvie! korošti Anna Bogalii kilpailujen lopušša.
