Voden satused: Vladimir Putin vedi jogavoččen press-konferencijan
Tämbei, 14. tal’vkud, Venäman prezident Vladimir Putin vedi jogavoččen press-konferencijan, miččel tegi voden ühthevedod da starinoiči voden satusiš. Azjtego mäni Moskvas. Paginvastusele tuli enamba 500 toimitajad venälaižiš da verazmaižiš joukvestištoišpäi.
Enamba nelläd časud jatkui oiged transl’acii, miččen aigan Venäman prezident andoi vastusid 67 küzundaha. Küzundad koskiba, ozutesikš, speciališt voinoperacijad Ukrainal, Venäman kehitoitandad i sen irdpol’- da südäinpolitikad. Prezident starinoiči mugažo ekonomikan situacijas Venämal.
— Endustusiden mödhe, voden lopuks Venäman ühthižen südäitavaran (VVP:n) ozutai kazvab 3,5 procentale. Nece om hüvä satuz, pagižeb Vladimir Putin.
Prezidentan sanoiden mödhe, infl’acii Venämal om kaik-se kazvanu.
— Varastadas, miše voden lopuks infl’acii linneb läz 7,5 procentad vai vähäižen enamba – 8 procentad, sanui Vladimir Putin.
Venamän eläjiden keskmäine elonpiduz’ voib kazda.
— Vodel 2021 keskmäine elonpiduz’ Venämal oli 70,06, vodel 2022 se oli 72,73, a täl vodel se voib olda 74 vot, starinoiči Vladimir Putin.
Täl kerdal press-konferencijan erigoičusen oli se, miše joukvestištoiden toimitajiden küzundoiden ližaks prezident andoi vastusid Venäman eläjiden küzundoihe, miččid oli oigetud enamba 2 millionad. Niid tuli muga äi, sikš ku jogavottušt prezidentan Oiktad linijad täl vodel ei tehkoi.
Azjtegon sädajad toivotiba, miše prezident andab vastused kaikihe oigetud küzundoihe.
Uzištoid neciš temas voib lugeda mugažo karjalaks da suomeks.
