Kontupohjašša loputtih avonaiset henkilökohtaset ta joukkojen väliset kyykkä-kilpailut. Ne kerättih urheilijie Karjalan eri piirilöistä ta Tverin alovehelta.
— Tänä vuotena kilpailuh ošallissuttih joukot Kalevalan, Kontupohjan, Sortavalan, Priäžän, Segežan, Aunukšen, Pitkärannan piirilöistä šekä Petroskoista, Koštamukšešta ta Tverin aloveh Ostaškovin kaupunkista. 16 naista ta 30 mieštä kilpaili henkilökohtasešti. Joukkokilpailuissa oli šeiččemen naisjoukkuo ta kymmenen šekajoukkuo, šelitti kilpailujen vetäjä Danil Brovin.
Urheilijat kilpailtih nellällä kentällä ta vihman takie ne oltih eri kunnošša, mi huomattavašti vaikutti kilpailun tulokših. Toiset kentät oltih jiäššä — kyykät lennettih hyvin, a toiset — märäššä lumešša ta kyykät tartuttih lumeh. Ka huonošta šiäštä huolimatta kilpailut oli pietty.
Henkilökohtasissa kilpailuissa voitettih Juri Krotov (Ostaškov) ta Natalja Malikina (Kalevala). Naisien joukkojen kešen voitti Natali-joukko, a miehien kešen — Kustka-joukko.
Kontupohjan kyykkäpeluajat aktiivisešti kehitetäh kanšanpelie, juštih šielä ilmeštyy lähiaikoina enšimmäini ammatillini kenttä pelie varoin.