“Vepsän kul’turjäl’gestuz” – ”Karjalan voden kirj 2023”
Tämbei Karjalan Rahvahaližes kirjištos oli valutud ”Voden kirj”. Täl kerdal 45 painust voibištelihe vägestuses.
Täl kerdal ”Voden kirj”-arvlahjan sai ”Periodika”- painišton painuz – Zinaida Strogalščikovan da Tamara Guzenkovan kirj ”Vepsän kul’turjäl’gestuz”. Kirjas om Vladimir Pimenovan pöudmaterialoid, miččid hän kerazi vozil 1950-1960 vepsläižiden eländtahoiš- Karjalas da Piterin agjas.
— Om melentartušt, miše kirjas om tedod sijoiš, miččiš minä elin laps’aigal, no minä en tedand necidä, a Vladimir Pimenov kerazi da kaiči nened materialad, i nügüd’ völ enamba ristituid voib tedištada vepsläižiš, sanui üks’ kirjan avtoroišpäi Zinaida Strogalščikova.
Tariž ližata, miše “Vepsän kul’turjäl’gestuz”-kirj vägesti völ koumes nominacijas.
Mugažo diplomad neciš kirjas sai taidehtoimitai Jelena Nikitina da kaik, ked abutiba tehta kirjan.
Täl kerdal oli 6 nominacijad: ”Карелия-Karjala”, ”Tedon vauged”, ”Klassnaja kirj”, ”Lugeda da völ lugeda”, ”Minun rand da sen ristitud” da ”Kirjan taideh”. ”Karjalan Voden kirj 2023” -konkursaha ühtni 45 panust, a kaiken ”Voden kirj” -ozutelusel om ezitadud 212 painust, niiden keskes om kodirandan, lapsiden literatur, openduzkirjad da äi tošt.
