Valmistandu Karjalazien Kerähmöh algavui
Karjalazien kerähmö pietäh kerran nelläs vuvves. Sil nostetah ezile karjalan rahvahan elaigua, suavutuksii da hädii. Kerähmöh vallitah deleguattoi Karjalan kaikis piirilöispäi, kučutah virguniekkoi, žurnalistoi, kunnivogostii da myös karjalazien keskes tundiettuloi aktivistoi. Tuliedu kerähmyö tuas autetah pidiä tazavallan b’udžietan varal Karjalan Rahvahan Liiton projektan kauti. Kerähmön merkinny on Ven’al menii Perehen vuozi.
— Deleguatat piirilöis pidäy vallita oraskuus algajen kezäkuun loppussah, sanou Nevvoston paginanvedäi Raisa Samodajeva.
Kaikkiedah deleguattua roih kuuzikymmen viizi — se on kahtukymmendy kolmie hengie vähembi migu vuvvel 2020 pietys Kerähmös. Lugu väheni sendäh, ku karjalastugi rodih vähembi. Joga Kerähmöh vältämättäh kučutah Karjalan tazavallan piämies.
Nevvostolazet ollah varustamas Kerähmön aijankohtastu ustuavua, kudaman mugah Karjalazien kerähmö iellehgi roiteh registrukirjoil olematoi rahvahan liikeh — moine periuateh on oigevuonmugaine Ven’an zakonoin myöte. Kerähmöläzet suahah šeikuija sidä projektua da iänestiä. Kuigi endizien kerähmölöin aigah, nevvoston paginanvedäi raportoiččou nellivuodehizes ruandas. Kačotah pidiä kolmen ozaston ruandua. Tiemat ollah moizet kui “Karjalazien perindöllizet eländykohtat”, “Karjalaine tänäpäiväine pereh”, “Kieli da kul’tuuru”. Kerähmös nostetah ezile jälgimäzen Rahvahan luguhpanon tulokset, ekolougii- da ekonoumiekkuaziet, kielen opastamine, karjalazien aktiivižus da omaničen voindu.
Kerähmö pietäh Karjalan piälinnan keskukses Piter Inn -hotellis. Pido alguudah myöte on olluh suurennu pruazniekannu karjalazien liikkehes. Täs kuuluu karjalaine kieli, tämä on aktivistoin näindy- da paginkohtu. Tavan mugah Kerähmön aigah pietäh kul’tuuruprogrammoi da ezitetäh jälgivuozien suavutuksii.
