Mušt Paanajärven kadonuziš küliš kaičese
Karjalan Rahvahaližes muzejas avaitihe uz’ ozuteluz, mitte om omištadud kahtele Karjalan kadonudele küläle — Olangale da Vartiolampile.
“Paanajärven kadonuded küläd” -ozuteluz starinoičeb Vartiolampi- i Olanga- küliden istorijas da elo-ozas. Molembad küläd kadoiba: Vartiolampi oli polttud Suren voinan aigan, a Olanga oli upotadud gidroelektrostancijan sauvomižen taguiči. Ozutelusele tuli tedomehid, istorijan tundijoid da navedijoid, kadonuziden küliden eläjiden jäl’genikoid.
— Ozuteluz om omištadud kahtele Karjalan küläle, no sen-žo aigan se starinoičeb meiden röunan istorijan erigoičusiš. Om lujas žal’, no meiden muzejas om kaičenus vaiše viž fotod 1928. voden etnologižes ekspedicijaspäi Karjalan Pohjoižehe. Siloi meiden muzejaha oli todud 160 fotod da 70 kalud! Uz’ ozuteluz ei ole sur’, sen kalud om ezitadud fotoin banneroiš. Sikš ozutelust om kebn sirtta sijalpäi sijale, sanui ozutelusen kurator Jekaterina Logvinenko.
Vaumištades necidä ozutelust kävutadihe Karjalan Rahvahaližen muzejan, “Paanajärvi”-rahvahaližen parkan, Venäman etnografižen muzejan da Suomen muzejiden fondoiden materialoid.
Ozutelusen avaidusel oli letud ezile kadonuziden küliden tem, se sünduti äi diskussijoid. Ozuteluz om avaitud sulakun 21. päivähasai. Sid’ se vedetas Karjalan muzejidme.
Uzišt neciš temas voib lugeda mugažo karjalaks.
