Vuvvennu 2023 programman kilbah otettih 189 projektua, kudamien yhtehine summu oli 387,7 miljounua rubl’ua. Se on 100 miljounua rubl’ua enämbi ku vuvvennu 2022.
Vuvvennu 2023 kilvas vallittih da todevutettih 80 projektua, niilöin yhtehine summu on 143,8 miljounua rubl’ua. Karjalan b’udžietaspäi sih meni 97,8 miljounua rubl’ua.
— Paikallizien initsiatiivoin kannattamizen programmu allus algajen kannatti pienii projektoi, yhteh projektah annettih vaiku 500 tuhattu rubl’ua valdivollistu abuu. Vuvves 2023 algajen programman suurin abu yhteh projektah on kolme miljounua rubl’ua, ilmoittau kanzallizen poliitiekan ministerstvu.
Tieduo projektoin vastah ottamizeh da todevuttamizeh nähte löydyy saital инициативы-карелия.рф. Saital on kartugi, kudamas nägyy, kus da mittumat projektat oli jo todevutettu Paikallizien initsiatiivoin kannattamizen programman mugah.
Tavan mugah projektoi kilbah otetah vastah vuvven lopus. On aigu miettie da kirjuttua paras projektu vuvvekse 2025 oman eländykohtan da omamualazien hyväkse.