Kipinä-žurnualu lähti gostih
Tänäpäi “Kipinän” toimittajat oldih gostis Petroskoin školan n:o 2 nelländen da viijenden kluasan opastujien luo Kipinäläzet kerrottih, kui žurnualu piäzöy ilmoih, midä luajitah piätoimittai, toimittajat da taidoilijat, mittuzet eroitukset ollah julguamon da kniigupainamon välil. Paiči sidä lapset yhtyttih tiedokilbah da tiijustettih äijy uuttu Petroskoih da Karjalah nähte. Urokan aigua lapset iče opittih olla žurnualan taidoilijoinnu da luajittih kanzi Kipinä-žurnualale.
— Suomen kieldy lapset opastutah nygöi enzimäzes kluasas algajen. Sidä on vaiku yksi čuassu nedälis viijendes kluasas. Enzimäzes kluasas nelländeh kluassassah on kaksi čuassuu nedälis. Nygöi yheksäs kluassu on jälgimäine kluassu, kuduas opastutah karjalan kieldy meijän školas, pahelziu Petroskoin školan n:o 2 karjalan da suomen kielien opastai Nadežda Kauranen.
Joga vuottu Kipinä-žurnualan toimittajat kävväh Petroskoin da Karjalan školih kerdomah žurnualas da kučutah lapsii žurnualan toimitukseh gostih, potakoijah yhtymäh kilboih da suamah lahjoi. Toivotammo, ku tulieh kilbah yhtyy äijy školaniekkua.
