Tänä vuotena 96 autuo šekä motoklubin ošallistujat ajettih matka Petroskoi—Pyhäjärvi—Petroskoi. Vuuvvešta 2013 ajomatan ošallistujat matatah autoilla muistopaikoilla, missä vuuvven 1941 šykyšyllä piettih taisteluja Petroskoin puoluššukšešta ta missä nyt on muistomerkkijä. Autokolonnan pivuš oli noin 4,5 kilometrie. Aktijo yhisti šuurimman miärän ošallistujie šen 11-vuotisešša istorijašša.
Ajomatka perintehellisešti alko Petroskoissa. Ikuisen tulen luona pietih hil’l’ani hetki ta šiitä Venäjän ta Karjalan lipulla šekä Voiton lipulla korissetut autot ajettih vanhah karjalaiseh kyläh Priäžän piirissä — Pyhäjärveh.
Pyhäjärveššä mitinki oli pietty Kunnivonkummulla.
—Täššä paikašša oli löyvetty 37 šotilahan jiännöštä. Oli piätetty hauvata ne kummulla, mi on kylän alušša. Myöhemmin tämän hauvan luona järješšettih vielä kolme hautua. Nyt niissä on 106 Petroskoin puoluštajan jiännökšie, kerto Priäžän piirin etnokulttuurikeškukšen johtajan šijahini Tatjana Seppänen.
Mitinkissä piettih pakinat automatan järještäjät Ilja Gerasjov ta L’udmila Vatanina šekä Petroskoin leirin entini vanki Lenina Makejeva. Šen jälkeh ošallistujat kačottih löyvetyn ašen näyttely ta tarkissettih tietojah šovašta kyšelyššä.