Jubilei voden “Vepsän kul’tursebr” tegeb “SanuLugeKirjuta!”-projektad. Sen taguiči openduzplatforman abul oli sätud onlain-trenažor vepsän kelen opendamižen täht.
— Onlain-trenažos jo nügüd’ opendasoiš Änižröunan da Suomalaiž-ugrilaižen školan lapsed da opendajad, universitetan üläopenikad da aktivižed vepsläižed Venäman erazvuiččiš agjoišpäi. Ühtnikoiden keskes oma kut nored, muga vanhembad-ki ristitud, kenel om sur’ taht paremboita kodikelen tedoid da mahtoid, starinoiči sebran pämez’ Larisa Čirkova.
Paiči sidä projektan aigan tehtas ližaopenduzkirj vepsän kelel nenile ristituile, ked opendaba vepsän kel’t ani augotišespäi.
“Vepsän kul’tursebran” jubileivastuz-žo planiruitas tehta sügüzel Šoutjärven küläs “Loninan lugemižed” -konferencijal. Nece konferencii mäneb kerdan kahtes vodes, täl kerdal se linneb omištadud “Vepsän kul’tursebran” jubilejale.
— Mö toivom, miše kaik “Vepsän kul’tursebran” aktivistad, ked oliba organizacijas ani augotišespäi, starinoičeba, kut hö udessündutiba vepsän kel’t, vepsläšt kul’turad da miččed meled pidiba päs siloi, 35 vot tagaze, ližazi Larisa Čirkova.
Hän mugažo toivob, miše konferencijaha ühtneba nored vepsläižed aktivistad da starinoičeba vepsän rahvahan nügüdläižen elon polhe, uziš projektoiš, planoiš da idejoiš, kut voiži edemba-ki kehitoitta vepsän kel’t da kaita vepsän rahvahan kul’turad toižile sugupol’vile.