Šoutjärven muzejas avaitihe uz’ ozuteluz
31. keväz’kud Šoutjärven vepsläižes etnografižes muzejas avaitihe “Tedon kastkuine — sötab melid” -ozuteluz. Ekspozicijal om pandud ezile erazvuiččid kaluid, arhivan fotoid da azjbumagoid, rahvahan sädoid da sobid — kaik, miččel om sur’ znamoičend vepsläižiden istorijan täht.
— Kut penid homendezkastken tippuižid kastab mecheinän jurid, muga i tedon pilazmoid sötab ristitun mel’t, sanuba ozutelusen sädajad.
Uz’ ozuteluz om omištadud koumele tärktale päivmärale. Ezmäine om “Vepsän kul’tursebran” jubilei: vodel 1989, 35 vot tagaze, oli sätud nece organizacii. Toine om Venäman tedoakademijan 300-vozne jubilei. I koumanz’ om Perehen voz’: 2024. voden aigan Venämal tehtas erazvuiččid azjtegoid, miččed om omištadud kanzale da kanzan kal’husiden popul’arizoitandale.
“Tedon kastkuine — sötab melid” -ozuteluz ühtenzoitab nene päivmärad, miše ozutada, kut ristitud napriba kerata, kaita da antta norile ezitatoiden tedoid.
Ozuteluz varastab ičeze kävujid adresadme: Šoutjärv’-külä, Počtovaja-ird, 28.
