KV-show kävi lyydiläisien luokše
KV-show -ohjelman uuši ta tämän vuuvven enšimmäini lähetyš on omissettu lyydiläisillä. Aleksandra Aniskina ta Andrei Gorškov lähettih kuvuamah šitä lyydiläiseh kyläh Pyhäjärveh. Lähetykšeštä työ tiijuššatta missä lyydiläiskarjalaiset eletäh, montako heitä on, mitein kieli kuuluu ta kuin aktivistit šäilytetäh omua kulttuurie ta kieltä. Lähetykšen valmistamisešša vetäjie autto Karjalan tietokeškukšen kielen, kirjallisuon ta istorijan instituutin spesialisti, lyydiläisen murtehen tutkija Aleksandra Rodionova.
— Myö läksimä kuvaukših lyydiläiseh istorijalliseh kyläh Pyhäjärveh yheššä vetäjien ta kuvuajan kera. Kuvasima kylyä ta paikallisie eläjie. Še oli oikein mukava. Tietoja lyydiläisistä on oikein äijän ta yhtä lähetyštä ei riitä, jotta kertuo kaikešta. KV-SHOW on oikein šuosittu projekti Karjalašša ta šen ulkopuolella ta mie toivon, jotta lähetyš auttau šuaha enempien ihmisien kiinnoššušta. Mie kyllä tahtosin, jotta lyydiläisistä ois kuvattu muutoma lähetyš, šano lyydiläisen murtehen tutkija Aleksandra Rodionova.
Ohjelma on venäjän kielellä, šitä voipi kaččuo Oma Media -portalissa ta KV-show -projektin Vkontakte-ryhmäššä.
KW-show -projekti starttasi kakši vuotta takaperin Karjalan kanšallisen ta alovehellisen politiikan ministerijön šekä Karjalaisien, šuomelaisien ta vepšäläisien kieliresurssikeškukšen kannatukšella.
Aihiešta voit lukie niise venäjäkši.
