Tipazet: Lapšet opaššutah kieltä leikkimällä
Tverissä toimiu karjalankielini lapšiklupi “Tipazet”. Pakinaklupin johtajat Tatjana Žil’tsova, Ol’ga Pavlova ta Tatjana Ivanova kekšitäh leikkijä, kisoja, teatteriesitykšie lapšie varoin. Kerho rupesi toimimah viime vuuvven lopušša. Täkši päiväkši lapšet ošatah leikkimäh lautapelilöih karjalakši ta valmissettih enšimmäini karjalankielini spektakli.
Juštih klupie varoin oli valmissettu karjalankielini peli “Kalarokka”. Peluajat ollah keittäjät, kumpaset valmissetah makieta rokkua ta kenen kala enšimmäisenä piäšöy rokkah, še peluaja ni voittau.
— Mie iče ylen tykkyän lautapelijä, šentäh miun himotti, jotta meilä olis oma karjalankielini peli. Mie otin Mark Andren kekšimän kielirippumattoman pelin “Splendor”, tekoälyn avulla uuvvistin korttija, valmistin pojan kera puisie kaloja. Nyt mielelläh peluamma ta keitämmä omua rokkua veještä, kalašta, muajuablokašta (‘potakašta’), morkušta (‘porkkanašta’), šuolašta ta tietyšti armahuošta, šano klubin vetäjä ta pelin kiäntäjä Tatjana Žil’tsova.
Nyt kerho keräytyy kerran netälissä. Lapšet ta vanhemmat valmistauvutah kešäkši, kekšitäh spektaklie, jotta lapšet voitais esiintyö festivaliloissa. Hyvyä kokemušta heilä jo on. Ei ammuin “Tipazet” näytettih varjospektakli “Tubone” karjalan kielellä ta še šynnytti šuurta ihaššušta kaččojilla.
Kerhošša on äijän šuunnitelmie ta ajatukšie. Šen vetäjät šanotah: “Meilä on himo ruatua kaiken, mitä myö vain voimma ruatua”. Kerhošša käypi vakituisešti 5–6 lašta ta heijän vanhemmat.
