Zalavruga-vierailukeškuš ottau vaštah yleisvenäläisen konferenššin
Šajekuun 1.—5. päivinä Zalavruga-vierailukeškuš ottau vaštah yleisvenäläisen tieto- ta käytäntökonferenššin. Šen aihiena on Muinani kallivotaito: šäilyttämisen, johtamisen ta käytön nykyaikaset proplemat. Tilaisuš on šijotettu Vienameren rannalla šijottunuon Besovi Sledki -kallivopiirrokšien löytämisen 100-vuotisjuhlah. Šiitä ilmottau Karjalan tašavallan piämiehen lehistöpalvelu.
— Tilaisuon aikana esitetäh šeloššukšie eri aiheista, muun muašša Vienanmeren alovehen kallivopiirrokšien löytämisen istorijašta, Vienanmeren alovehen kallivopiirrokšien löytäjän Aleksandr Linevskin henkilöštä, UNESCO:n musitomerkin šäilyttämisen kokemukšešta, kallivopiirrokšien popularisoinnašta, niijen esittelömiseštä musejoissa ta muušta teemoista, kerrotah tiijotukšešša.
Konferenšših ošallissutah Venäjän tietoakatemijan Ainehellisen kulttuurin istorijan instituutin, Krasnojarskin pedagogisen yliopiston, Kemerovon yliopiston, Tomskin kallivopiirrokšet -musejon, Kazahstanin tašavallan kanšallisen musejon, Šul’gan-Taš-luonnonšuojelualovehen, Valtijollisen Ermitašin ta Kanšainvälisen restaurointakeškukšen etuštajat.
Yhty Oman Median MAX-kanalah!
