Yhteiskunnallisvoimien yhistämini on forumin huomijopistehenä
Šajekuun 6.—7. päivinä Petroskoin valtijonyliopistošša ta Točka kipenija-keškukšešša vietetäh Venäjän kanšalaiskamarin Yhteyš-forumie. Tilaisuš keräsi kanšalaisjärještöjen etuštajie, liikehmiehie, kanšalaisaktivistija, volont’orija, lehtimiehie, virkamiehie ta kaikkie, ket kiinnoššutah kanšalaisyhteiskunnan kehitykšeštä.
Vuuvven 2022 forumin aihiena on Yhteiskunnallisvoimien yhistämini: muan keštäjä kehityš. Täyši-issunto oli omissettu šamalla teemalla.
— Yhteiskunnallisien instituuttien merkityš valtijošša kašvau kuot’t’elukšien aikana. Vaikeukšet yhissetäh ta näytetäh ihmisien parahie kanšalaispuolie. On tärkietä nähä resurssija ta käyttyä niitä asiellisešti. Jotta meijän alovehet oltais hyvinpärjyäjinä, meijän pitäy ruttoh mukautuo muuttujah elämäh. Ka šamah aikah meijän istorijallisien, henkellisien ta moralisien peruštehien pitäy jiähä muuttomattomiksi, korošti Karjalan tašavallan piämieš Artur Parfenčikov täyši-issunnošša.
Forumin ohjelmašša on väittelyjä, issuntoja, pyörie stolie, muasteri-oppija, seminarija, työneuvotteluja ta harjotukšie. Aktualisih aiheih kuuluu tervehyšhoito ta lakienluajinta, patriottini kašvatuš, ekologija, pereharvot, kanšainvälini yhteistyö ta muut.
Lisätietuo šuau lukie Oma Mua -lehen šeuruavašta numerošta 12.10.2022.
