Vuvven kirju 2025: kilbu algavui kirjuozuttelus
Karjalan Vuvven kirju -kilbu algavui Karjalan Kanzallizes kirjastos avatus kirjuozuttelus. Nähtävät kirjat jullattih vuvvennu 2025 da net piästih vuvven aigah kirjaston kirjukamarih. Ozuttelus on 203 julgavuo da net ollah eri luaduu: kaunokirjalližuskirjat, tiedo- da histouriitevokset, opastus- da lapsien kirjat, karjalazien kirjuttajien tevokset, vepsän- da karjalankielizet julgavot da runot.
Karjalan Vuvven kirju -nimie suamas kilbailou 53 kirjua. Julguajat iče vallittih da työttih kirjat kilbah.
Mennyt vuon Petroskoin Periodika-julguamo piästi ilmoih 17 kirjua, kudamien joukos on kui uuzii julgavoloi, mugai uvvessah painettuloi.
— Jogahine kilbah työtty kirju on pitkän matkan tulos da rakkahus omah ruadoh. Tänä vuon Periodikan kirjat kilbaillah kuvves kategouries, kuduat ollah Kirjan taido, Hyvä kirju, Tiijon valgei, Karelia=Karjala, Kodirandu da sen eläjät da Lugietah da lugietah uvvessah, kerdoi Oma Mediale Periodika-julguamon kirjuozaston piälikkö Tatjana Tiškova.
Ozuttelu on avvoi kevätkuun 22. päiväh suate. Sen aigah arvostajat tuttavutah vuvven 2025 painettuloih julgavoloih.
Kai tahtojat voijah tuttavuo tevoksih da iänestiä mielužimis julgavolois Kanzallizen kirjaston kodisivul. Iänestys kestäy sulakuun 20. päiväh suate.
Vuvven kirjakse rodieu kirju, kudai suau enimite palkinduo eri kategourielois. Kilvan voittajat ilmoitetah da palkitah Kanzallizes kirjastos 23. sulakuudu.
Aihies voit lugie vepsäkse da suomekse.
Yhty Oman Median kanualah Telegramas!
