Vuuvven 2021 hyväkšyntäkampanjan tiijot on ilmotettu
Petroskoin valtijonyliopiston nettišivulla on ilmotettu tämän vuuvven hyväkšyntätiijot.
– Petroskoin valtijonyliopistoh on hyväkšytty 1369 abiturienttie. Heistä 117 henkie on otettu tarkotušmiäräykšen mukah. Tänä vuotena yliopiston 11 instituuttih on työnnetty kaikkieh 11 146 anomušta, kerrotah Petroskoin yliopiston saitilla.
Filologijan instituutin Itämerenšuomelaisen filologijan laitokšen Šuomen kielen, kirjallisuon ta karjalan kielen alalla oli annettu kuuši b’utžettipaikkua ta šiih oli työnnetty 78 anomušta. Näin kilpailu oli 13 henkie yhellä paikalla. Kuuši henkie on hyväkšytty.
Šuomen kielen, kirjallisuon ta enklannin kielen alalla oli yhekšän b’utžettipaikkua ta šiih tuli 99 anomušta. Šeiččemen henkie on otettu.
Šuomen kielen, kirjallisuon ta vepšän kielen alalla oli nellä b’utžettipaikkua ta šiih oli työnnetty 56 anomušta. Tänä vuotena nellä henkie on piäšty opaštumah.
– Muamoni on karjalaini, hiän on šyntynyt Kinnermäješšä. Tänä vuotena lopetin Vieljärven koulun. Muamoni opaštu karjalan kieltä yliopistošša. Mie piätin ruatua hänen mukah, vet viisahuš šanou, jotta ei šua unohtua omie juurie. A šuomen kieli on aina tarvittava, kun Šuomi on lähellä. Ennein opaššuin karjalan kieltä koulušša ta Karjalan kielen kojissa. Kielen opaštumisešša milma tuntuvašti autetah täti ta ämmö, kumpaset paissah miun kera karjalakši, šanelou tulija opaštuja Ivan Kalmikov.
