Vodel 2026 Karjalan školad saba 121,8 millionad rubl’ad
Kohendusihe, miččed koskeba zakonad regionan tulijan voden b’udžetas, mülüb Karjalan školiden täuden kohendusen ližarahoituz, tedotab Karjalan Valdkundan opendusen da sportan ministerstvan press-služb.
Ozutesikš, ani suren rahatugen, 90 millionad rubl’ad, sab Belomorskan škol №3. Nügüd’ sigä tehtas radod “Norišt da lapsed” -valdkundaližen projektan aigan. Artur Parfenčikovan sanoiden mödhe, škol tegese tärktaks etapaks lidnan kehitoituses, se andab ristituile paremdad elon olod.
— Pohjoižel tariž olda enamb ristituid. Sen täht om ani tärged antta heiden lapsile parembad opendusen olod, antta eri-igäižile ristituile voimuz hüvin da čomin lebaita lidnas. Sil vodel tegem Kul’turpertin sportzalan kohendusen, a tulijal vodel – kohendusen Belomorskan školas №3. Arktikan tugirahal tahtoim sauda irdsporttandrehen, sanui Karjalan pämez.
Belomorskan školan katuz om jo kohetud, iknad om vajehtadud. Nügüd’ kohetas kaik školan inženersistemad. Radod planuitas lopta tulijaks openduzvodeks.
Kahtes lähivodes “Norišt da lapsed” -valdkundaližen projektan aigan täuz’ kohenduz tehtas 20 regionan školas. Vodel 2026 udištadas školad Matrosi-, Kepa- da Podužemje-küliš. Neniš školiš kohenduzradod planuitas lopta voden aigan.
Kaks’voččen täuden kohendusen programmaha putui 5 openduzorganizacijad: Sortavalan škol №6, Belomorskan škol №1, Petroskoin škol №48 da Petrovskii kodimišt, a mugažo Mujezerskii-külän škol. Radod augotadas vodel 2026 i loptas vodel 2027. Mugažo vodel 2027 täuz’ kohenduz planuitas tehta völ 12 Karjalan školiš.
Uzišt neciš temas voib lugeda mugažo suomeks da karjalaks.
Tarkištele "Oma Median" Telegram-kanalad!
