6. šyyškuuta täyttäy 90 vuotta runoilijan Vladimir Brendojevin šyntymäpäiväštä. Resurssikeškuš Karjalan rahvahan liiton kera järješšetäh merkkipäivällä omissettu ilta.
— Ohjelmašša on Sa armas olet -nimisen filmin esityš, Natalja Čikinan valmistama luvento Brendojevin panokšešta karjalankielisen kirjallisuon kehittämiseh, tutuštumini runoilijan tevokših šekä Kanšallisen ta alovehellisen politiikan ministertijön spesialistin Svetlana Kostinan esityš kuštantamotoiminnan kannatukšešta, kerrotah tilaisuon järještäjät.
Kirjallisuušilta pietäh Periodika-kuštantamošša, Titovin kavulla 3, kello 17.30. Ennein toimenpitoh tulomista halukkahien pitäy ilmotautuo puhelimen (8142) 780315 tahišähköpoštin kautti.