“Vienan virta” juhli 25-vuotispäivyä

“Vienan virta” toimiu Louhen piirin karjalaisien kulttuurin šäilyttämisen hyväkši yli 25 vuotta. Juhlimah vuotispäivyä vuuvven piäštä keräyty koko sali paikallisešša etnokulttuuri keškukšešša.

– Tavan mukah meijän luona oltih sohjanankoškelaiset (meijän šeuran jäšenet)  ta kiestinkiläiset. Enšimmäistä kertua oltih vierahat Louhešta – Jakovlevijen pari. Antonina on  IX karjalaisien kerähmön valtuutettu Louhen piirissä, Sergei – uusi karjalaini runoilija, kumpani luki meilä omie kaunehie, šyväntä koškevie, vaikka  yksinkertaisie runoja, šano Anni Vlasova, Vienan virta -kanšalaisjärještön pakinanvetäjä.

Šohjanankošešta tulluot vierahat valmissettih karjalaisilla runoilla omissettuo ohjelmua, kerrottih runonlaulajista ta laulettih runoja. Niise toimenpivošša kerrottih šeuran ruavošta ta myönnettih šen jäšenillä kiitolliskirjasie. Vienan virran” jäšenet ta yštävät šuunnitellah iellähki ruatua oman muamonkielen hyväkši ta šäilyttyä karjalaisie perintehie.