Vesläžed: opaššumma karjalua leikkimällä ta laulamalla
Petroskoin Balakirevilla nimitetyššä musiikkikoulušša piettih Karjalan kielen päivä. Šen järještäjänä oli lapšien Vesläžed-folkloriyhtyveh. Ohjelmašša oli joikuja, lauluja, piirileikkijä karjalan kielellä šekä kielipelijä.
Päivän enšimmäiseššä ošašša oli konsertti: lapšet luvettih Valentina Karakinan ta Nina Arhipovan runoja, laulettih, esitettih joukuja, näytettih varjoteatterin spektakli, šoitettih jouhikolla ta kantelehella.
— Tänä opaššušvuotena myö rupesima opaštamah lapšilla karjalan kieltä. Šykyšyštä alkuan olemma opaštun elukat ta kašvit, numerot ta värit, ruoka ta aštiet -teemat. Opaššuttuo šanaštuo käyttimä pelilöissä, šelitti Vesläžed-yhtyvehen opaštaja Polina Vorobjova.
— Myö opaššumma vienankarjalua, šentäh kun yhtyveheššä esitämmä Vienan folklorie. Karjalan kielen päivänä tahtoma näyttyä mitä kaikkie onnistu opaštuo opaššušvuuvven aikana, lisäsi yhtyvehen johtaja Ol'ga Gabukova.
Päivän toisešša ošašša lapset leikittih šanapelih, Kukat ta tarhanhoitaja-keikkih ta Vesläžed-kahvilah. Yhtyveheššä on kolme ikäryhmyä ta yli 30 opaštujua.
