Vepsläine sarn kucub lapsid ühteta festivalihe
Regionankeskeine festival’ “Vepsläine sarn” tuli jo čomaks tradicijaks. Se tehtas kerdan kahtes vodes. Täl vodel pandemijan taguiči se mäneškab online-formatas, festivalin tem om ”Kaikkuččel linduižel om ičeze pezaine”.
— Necil vodel festival’ “Vepsläine sarn” ezmäižen kerdan tehtas online-formatas. Ühteta festivalihe voiba lapsed da nored, nece voib olda kut üks’ ristit, muga kollektiv-ki. Nadeimoiš, miše toižel kerdal festival’ mäneškab kut ende i kaik festivalin ühtnikad voiba vastatas möst Kalages vanhan čoman tradicijan mödhe, sanub Rahvahaližen da regionaližen politikan ministerstvan radnik Ol’ga Sobolenko.
Miše ühteta festivalihe, pidab ozutada sarn vepsän kelel, tehta sen video 10 minutahasai pidudel. Nominacijad oma mugomad: ”Parahim rahvahan sarn”, ”Parahim avtoran sarn”, ”Parahim kanzan teatrozuteluz”, ”Pen rol’”, ”Parahim mužikan rol’”, ”Parahim toižen planan rol’”.
Pakičusid da videorolikoid voib oigeta vilukun 15. päivähasai adresadme znamanke ”Vepsläine sarn – 2021”.
Festivalin sädajan om ”Periodika”-paindišt Karjalan rahvahaližen da regionaližen politikan ministerstvan rahatugele. Tarkašti voib lugeda täs.
