Karjalan Naižiden foruman avaidusel valdkundan pämez’ Artur Parfenčikov andoi korktoid pauklahjoid aktivižile naižile. Heiden lugus om vepsläine aktivist-ki Anna Anhimova.
Anna Anhimova radab kul’turan poles jo 17 vot. Nügüd’ hän om Kiži-muzejan radnik da mugažo Suomalaiž-ugrilaižiden rahvahiden ligan pämez’. Necen sebran projektad om oigetud Karjalan karjalaižiden, vepsläižiden da suomalaižiden rahvahiden etnokul’turižehe kehitoitandaha.
— Minä navedin rata kul’turan poles. El’gendan, miše nece rad om minun elon azj. Minei om mel’he rata ristituidenke da ristituiden täht. Uskon, miše minai linneb völ äi uzid melentartuižid projektoid, miččed abutaba muzejile kehitoittas, miččed tugedaba ristituiden iniciativoid kul’turan kaičendan poles, sanub Anna Anhimova.
Arvokahan znaman samine tegihe varastamatomaks lahjaks Anna Anhimovan täht. Hänen sanoiden mödhe, mugoine lahj om hänen radon arv, mitte ozutab, miše hän valiči oiktan ten elos.