Vepsläižed varastaba uden vajehnikan lähtendad
Täl vodel Karjalan rahvahaližen da regionaližen politikan ministerstvan abul, rahatugele, mitte anttas Venäman Pohjoižen, Sibirin da Edahaižen Päivnouzman igähižiden vähäluguižiden rahvahiden socialižele da ekonimižele kehitoitusele, keratihe ”Uz’ venä-vepsläine vajehnik”.
Vajehnikan avtorad oma Ol’ga Žukova, Nina Zaiceva, Maria Mullonen. Sidä varastadas jo amu. Vodel 2007 lähtnuded sanakirjad jo ei voi löuta nikus, no küzund sille kazvab voziden sirttes. Uz’ painuz – nece om ližatud da udištadud vanh vajehnik.
— Tarkašti lugim vanhad vajehnikad. Täutim sidä udel leksikal. Mugažo ližazim verboile 3.personan imperativ-formid. Sikš ku paksus om sihe sidotud jügedusid. Ližaks Nina Grigorjevna kirjuti ezisanoid vajehnikan täht grammatižiš kategorijoiš da pani vajehnikan lophu grammatižid tablicoid, miččid ei olend vanhas vajehnikas. Kirjan lehtpolid tegihe enamba. Vajehnikas pagištihe tedomehiden nevondišton ištundal da hüväksitihe se, sanub üks’ vajehnikan avtoroišpäi Ol’ga Žukova.
Uz’ venä-vepsläine vajehnik lähteb eloho uden voden augotišes. Se oigetas ezmäi kaiked Petroskoin universitetha, kaikihe školihe, kus opetas vepsän kel’t, vepsläižiden elontahoiden kirjištoihe da kul’turpertihe, mugažo – Karjalan joukvestišton rahvahaližihe toimištoihe. Tiraž om 500 ekzempl’arad.
